林書豪：火箭冇內訌
【本報綜合報道】林書豪（Jeremy Lin）於早前球隊落敗後接連遭到占士夏登（James Harden）和杜域侯活（Dwight Howard）指摘，令火箭傳出內訌，更有報道指占士夏登和杜域侯活欺凌J.Lin。林書豪日前對外講解事情的始末，表示係自己未能達到兩人的要求，同時透露球隊仍有一個極大隱患，就係未完成磨合。
「我同夏登同時上陣嘅時間仲好多，球隊要我保持攻擊性，同時扮演板凳嘅領袖，呢個係佢哋委派畀我嘅任務。我同夏登上季開始其實已經唔太夾，場上欠缺化學作用。今年都係一樣，我唔能夠話我哋磨合冇問題。」林書豪一語道破火箭現時的隱患，球隊在進攻和防守上都出現磨合問題。
重返麥迪遜助球隊贏波
林書豪同時解釋內訌之說：「我要澄清大家爭執並唔係內訌，唔係發生矛盾，而係因為磨合問題令大家有啲摩擦。杜域侯活啱啱加入球隊，我哋搵緊更好嘅配合方法，希望大家互惠互利。」J.Lin同時透露自己對做後備的睇法，認為自己成名前最高目標係做第六人，就算不能進入輪換都有望做「飲水機管理員」。
林書豪在這種心態支配下壓力愈來愈細，表現亦愈來愈出色。昨天重返成名地麥迪遜廣場公園出戰母會紐約人，於占士夏登回歸下再次以後備身份上陣貢獻21分，包括最後一節連奪9分及兩度成功入樽，協助火箭以109比106險勝，為明早主場對金塊一戰注入強心針。
（廣東體育周日早上9時直播）