唐偉楓銀石「少年車神」
尋日澳門大賽車有唔少香港車手取得好成績，較受注目嘅係18歲小將唐偉楓（Shaun），佢喺青年冠軍方程式系列賽取得季軍，呢名「少年車神」今年初負笈英國利物浦大學，邊讀邊喺銀石賽車場練車，希望大學畢業後可以成為全職車手。
上周五剛滿18歲嘅Shaun，喺黃竹坑港大同學會書院就讀到中六後，為咗令賽車技術更進步，年初到利物浦邊求學邊練車，並參戰英國雷諾方程式。14歲開始接觸賽車嘅Shaun，爸爸係賽車迷，經常到深圳玩小型賽車，Shaun就係跟隨爸爸玩Kart仔，獲FRD車隊賞識。Shaun今年轉投Eurasia Motorsport，車隊大本營喺銀石，佢要從利物浦搭兩小時火車至可以到車場練習，但佢非常樂在其中，話要多謝爸爸「出錢出力」：「爸爸財政上支持梗係重要，但最重要係幫手說服到媽媽，因為媽媽起初覺得賽車不安全。」
有望參加F3試車
不過，唐媽媽現時非常支持囝囝，雖然要同囝囝港英兩地分隔，但仍然覺得值得：「Shaun過咗英國之後技術真係進步好多，應承佢投入賽車之後我哋關係仲好咗，佢話讀完大學轉做全職車手。」唐媽媽愈講愈開心，仲透露Shaun有機會喺F3試車。