保羅佐治包場請師弟睇波
【本報綜合報道】曾為鬥牛犬効力兩季的溜馬球星保羅佐治（Paul George），踏足NBA後依然心繫母校球隊雷斯諾州鬥牛犬，除每個夏天都回歸校園擔任客席教練外，更每年都向一班師弟送贈波鞋等貴重裝備，手執5年總值9,000萬美元（約6.9億港元）新約都冇忘本，仲肯花時間回饋母校，真係抵佢咁受歡迎。
自掏腰包 掃晒萬五飛
鬥牛犬於美國時間本月16日就會出戰全美校際賽，保羅佐治日前就出手「掃晒」全場逾15,000張主場波飛，然後將換票證上載到學校網站，學生只要手執換票證影印本即可免費換取入場券。保羅佐治話今次咁大手筆搞「包場」，係因為弗雷斯諾州鬥牛犬個主場拍得住NBA級數，佢想班師弟仔感受吓爆棚嘅感覺，咁樣落到場戰意都會高昂啲。
好心有好報，保羅佐治昨日就貢獻21分及13個籃板球，率領溜馬主場以89比74擊敗騎士，開季3戰全勝。新季同樣全勝的尚有火箭同76人，當中76人又靠新秀卡特威廉士（Michael Carter-Williams）發威貢獻「26+4+10」數據，主場以107比104爆冷砌低公牛。
卡特威廉士 人氣爆燈
新季已連環揪低勒邦占士（LeBron James）及戴歷羅斯（Derrick Rose）兩位MVP，「MCW」如今已被視為「新人王」大熱，加上明早會迎擊勇士的76人，開季頭3戰所擊敗的球隊包括邁阿密熱火（Miami Heat）、芝加哥公牛（Chicago Bulls）及華盛頓巫師（Washington Wizards）的頭3個球隊英文字母，啱啱好砌成卡特威廉士嘅簡稱「MCW」，莫非天意注定卡特威廉士將會踏上巨星之路？