超人拉關係帶隊睇格鬥
【本報綜合報道】火箭中鋒杜域侯活（Dwight Howard）初到休斯敦，自然希望同一眾隊友聯絡感情。據《休斯敦紀事報》透露，火箭主場豐田中心日前舉辦終極格鬥冠軍賽（UFC），吸引到「超人」帶埋一眾火箭球員入場觀賞。UFC166（第166期）於火箭主場舉行賽事，更安排了一場冠軍爭奪戰，火箭球員又怎能錯過如此精彩的好戲。杜域侯活就約埋火箭隊友柏臣斯（Chandler Parsons）、占士夏登（James Harden）同林書豪（Jeremy Lin）一齊入場睇比賽，順便聯絡下感情。
夏登又要睇又要驚
杜域侯活同占士夏登於賽事舉行前更進入更衣室與兩位UFC冠軍人馬合照，「超人」之前曾現場睇過三次格鬥賽，到今日仍感到相當興奮；而占士夏登則從未睇過這些賽事，「大鬍子」表示：「真係好興奮，嗰啲人打得好勁，好似想挖對方個心出嚟一樣，仲去夾住對方個頭，都係一啲瘋狂嘅行為。當佢哋接近我哋時，雖然我身形比佢哋大，但都會有啲驚。」火箭幾位主將一齊入場觀賞格鬥賽，相信大家嘅感情都相當不錯，對日後球隊發展會有很大幫助。