勒邦占士「隱世婚禮」勁過波神
ＮＢＡ巨星勒邦占士（LeBron James）昨日與莎雲娜（Savannah Brinson）拉埋天窗，樂壇天后Beyonce忙到爆都趕到現場「做騷」，不過主人家以密不透風嘅保安守護婚禮布局，令美國一眾狗仔隊「冇啖好食」。「大帝」婚禮排場同待遇都勁過「波神」米高佐敦（Michael Jordan），這場「隱世婚禮」認真大陣仗！
Jay-Z Beyonce兩公婆畀面獻唱
一連三日嘅「大帝」世紀婚禮昨日係聖迭戈Grand Del Mar酒店舉行，由於占士禁止一眾賓客攜帶攝影工具及手機入場，加上呢間酒店搭起白色帳篷遮蓋大門入口，所以就算ＣＢＳ電視台出動直升機超越外圍樹林進行航空拍攝亦一樣食白果，齋睇保密措施同埋排場，都比「波神」今年4月再婚時有過之而無不及。
除咗安東尼（Carmelo Anthony）、韋迪（Dwyane Wade）及高比拜仁（Kobe Bryant）等籃壇巨星獲邀出席外，上周六仍喺巴西開演唱會嘅Beyonce亦趕到現場，更同老公Jay-Z獻唱大熱名曲《Crazy in love》賀占士大婚。要知道Jay-Z兩公婆一向甚少孖住「做騷」，近年亦只得美國總統奧巴馬連任就職典禮上獲此「待遇」，「大帝」今次都算有面咯！