滑雪美女沃恩自從做埋老虎活士女友之後，人氣更盛，最近接受時尚雜誌《Vogue》大談同老虎嘅關係，表示二人係一見鍾情，同活士拍拖之後生活積極。不過，沃恩斬釘截鐵話唔會結婚，就算係老虎都係咁話，因為佢對婚姻已經冇晒信心。
自從活士離婚之後，好多人都估佢冇咁快再拍拖，近日傳媒將沃恩一輯封面性感照曝光，就知道點解活士會被呢位滑雪天后迷得神魂顛倒。沃恩過去都影過唔少性感相，但呢輯相索爆程度簡直係爆晒燈，相片完全模仿莎朗史東嘅《本能》劇照，由頭到腳嘅裝扮跟莎朗史東似足8成，將沃恩嘅性感身材盡現，諗唔到呢位滑雪名將場內場外都極具「實力」，難怪活士咁快甘願被綁。
雖然沃恩甘願做跟得女友，正舉行嘅英國高爾夫球公開賽，由練習到正賽都全程陪住老虎，表現得相當恩愛，但原來沃恩冇諗過要做「老虎乸」：「我一定唔會同任何人再結婚，多謝！」點解沃恩咁決絕？事關佢有過一段唔開心嘅婚姻，2012年同前夫一刀兩斷；就喺同年，佢喺一個慈善晚會遇上活士，大家由朋友變為戀人。
沃恩仲話原本冇諗過要將呢段戀情公開，但因為佢當日喺澳洲遇上意外受傷，因而登上活士嘅私人飛機，引起公眾注意，幾個月後決定自己「爆料」：「始終係開心事，其他人點睇真係冇所謂，做你想做嘅事，開心就OK啦！」另外，活士喺英國公開賽首圈打出69桿，暫列第9。