大帝的新Tee熱火乘機掠水

全球矚目的NBA總決賽第七回合爭霸戰今早爆發,由熱火主場迎戰馬刺合演「熱.刺」大龍鳳,美媒估計這場大戰引發1.7億美元(約13億港元)收入。對於Game6出現有球迷誤判「熱火衰硬」而提前離開事件,熱火「三巨頭」之一的保殊(Chris Bosh)顯得甚不快,除鬧爆之外,更揚言今仗將力戰至最後一秒鐘。

(now 635、廣東體育及中央5台周五早上9時直播)

今早假邁阿密美航球場Tip Off的大戰,美媒預計這場巔峰對決勢必創造收視紀錄,帶挈聯盟從贊助商進帳1.7億美元收入,另據當地票務網站《TiqIQ》透露,今仗最貴票價已被炒到4.1萬美元(約31.7萬港元),足證賽事叫座力驚人。

最貴門票炒到31.7萬

熱火上仗化腐朽為神奇加時反勝,保殊揶揄上仗提早離場的熱火球迷做「偽Fans」,並發出永不放棄宣言:「上場提早走嘅球迷唔使嚟睇Game7,留喺屋企睇都得啦,總之我同班手足就未到完場都唔會放棄!」另外在Game6打到甩頭帶嘅勒邦占士(LeBron James),揚言因迷信關係會繼續戴頭帶,不過熱火會方就把握搵銀良機,昨日推出印有「NO HEADBAND...NO PROBLEM(冇頭帶冇問題)」的「大帝」Tee乘機掠水兼造勢。

至於馬刺前日輸波後則集體食消夜作賽後檢討,老將鄧肯(Tim Duncan)稱:「今餐消夜好有幫助,一來唔使各自返房胡思亂想,二來可以傾吓Game7策略。」