熱火教頭無敵起底王
NBA季後賽東岸冠軍爭霸戰周四「開火」，鑑於溜馬及紐約人今早才進行準決賽Game6大戰，聯盟「一哥」熱火焗住做好兩手準備，連日來要起上述兩軍底，不過熱火主帥史普斯達（Erik Spoelstra）堪稱NBA「起底王」，經歷地獄式資料搜集的「捱騾仔」日子後，如今已由昔日的剪片佬化身為冠軍級教頭，難怪昨日揚言備戰東岸決賽冇難度啦！
不少籃球教練都是紅褲子出身，但由剪片做起亦屬進身教練行列的一大渠道，皆因剪片人員要將列強大起底，長期研究列強攻守模式，無疑對戰術部署及調兵遣將兩瓣工作打好根基，溜馬教練禾高（Frank Vogel）及騎士主帥米克布朗（Mike Brown）亦是由剪片出身，但講到聯盟「起底王」就肯定非史普斯達莫屬！
占士自爆練定罰球
史普斯達於25歲時已經擔任熱火剪片人員，4年後上位做助教，08年榮升教練，去季更帶隊勇奪NBA總冠軍。憶述昔日「捱騾仔」日子，史普斯達昨日向記者稱感觸良多：「熱火喺95年成績好差，但最尾竟然以東岸第4衝線，嗰晚我用咗13個鐘去研究首輪對手黃蜂嘅戰術，足足寫咗4份20頁厚嘅戰術報告，所以今次研究溜馬同紐約人兩隊波，濕濕碎啦！」
教練胸有成竹，主將勒邦占士（LeBron James）自爆等待東岸決賽對手期間喪練罰球，熱火衞冕工作做到足，博彩公司betvega都睇好該隊能冧莊封王，將熱火列為1.3倍大熱，馬刺（6倍）及灰熊（7倍）則緊隨其後。
本報綜合報道