狂牛破網 索媽靚妹撐場 諾亞神勇領軍入8強
東岸雙雄公牛火併籃網的季後賽昨日進行「搶七大戰」，公牛全靠中鋒諾亞（Joakim Noah）貢獻24分、14個籃板球及「Block死」籃網中鋒布克盧比斯（Brook Lopez），協助球隊作客以99比93擊敗籃網，總場數贏4比3晉級次圈。諾亞場內威盡，場外則有定居布魯克林的靚媽同靚妹入場打氣，諾亞之家可以話「反客為主」艷壓巴克萊中心。大家如果仲想睇「索爆母女團」，明早公牛於東岸四強挑戰熱火就記住要留意啦！
公牛中鋒諾亞昨仗表現着晒火，首節已貢獻10分及5個進攻籃板球，完全控制內線，加上全場五次封阻籃網得分主力布克盧比斯的進襲，成為公牛以6分之差贏波晉級的最大功臣。諾亞賽後表示：「今場勝利我會銘記一世，我哋（公牛）企喺世界最大嘅舞台上面，次圈挑戰熱火將會係一場艱苦戰役！」諾亞固然屬於今仗主角，其母親Cecilia及胞妹Yelena亦都搶盡風頭。
定居於紐約布魯克林的Cecilia及Yelena昨仗入場為諾亞打氣，司職模特兒的Yelena賽後與哥哥諾亞攬頭攬頸的片段更於網上瘋傳，不少球迷都視Yelena為「公牛女神」並展開大起底。至於曾當選瑞典小姐的母親Cecilia更向記者透露，明日會與Yelena一同到邁阿密繼續為囝囝打氣，「索爆母女團」勢將再成焦點。
晉級撼熱火睇淡
將於東岸四強挑戰熱火的公牛，曾於3月底滅「火」終止該支聯盟「一哥」的常規賽27連勝紀錄，今次季後賽冤家路窄，當然想重溫好夢。不過，打入東岸準決賽的公牛現時陣營可謂天殘地缺，「矮仔入樽王」尼特羅賓遜（Nate Robinson）早在首圈Game5打到嘔、而今季平均每場上陣44.8分鐘的鄧格（Luol Deng）亦因腦膜炎而缺陣，公牛眾將打到殘同嘔，相信難敵擁有7日休息時間的熱火，熱火明早讓到7.5分上盤都信得過。
（周二早上7時開賽）