超人侯活一炮雙響

自稱係虔誠教徒嘅杜域侯活私生活一向混亂，出道以嚟不斷「沙沙滾」，直至遇上模特兒兼歌手姬絲汀先稍為定性，上年尾仲向對方求婚添！據美媒《MediaTakeOut》報道，姬絲汀喺本月13日透過twitter留言話「好Happy」，星期一入場睇湖人作客馬刺的季後賽時，更被狗仔隊睇到佢突晒肚。

不過好戲在後頭，有位叫伊莉絲（Iizz Weston）嘅女球迷喺呢場波賽後向傳媒自爆同杜域侯活有一手，仲舉牌話：「杜域，我將會成為你第六任BB嘅媽媽！」伊莉絲之後仲喺杜域侯活個twitter窮追猛打，「超人」事後扯火回應：「我冇五個BB嘅媽媽，你咁做真係好難睇，唔係淑女所為。」

保羅佐治獲最佳進步獎

杜域侯活唔認有6個BB媽媽，連5個都話冇，而美媒幫杜域侯活計過數，佢2010年拋妻棄子同前魔術啦啦隊成員里德（Royce Reed）離婚，之後搞大過健身教練Alexa Hope同模特兒Tiffany Reyner個肚，連同姬絲汀在內，伊莉絲頂多係侯活嘅第五任BB媽咪，不過點都好，呢單嘢對杜域侯活嚟講睇嚟都有排煩！

另外，溜馬的二年生保羅佐治（Paul George）今季大爆發，每場平均貢獻17.4分、7.6個籃板球及4.7次助攻，眾望所歸力壓黃蜂控衞華斯基斯（Greivis Vasquez）及公鹿中鋒辛達斯（Larry Sanders），以311分獲選為NBA年度最佳進步球員。