普查安戇豆上身

表情古怪 烏龍百出

已經有「地中海」的泰國球手普查安，是繼華達拿之後第二位打入世桌賽決賽圈的泰國球手，目前世界排名70，賽前一致未被睇好，首節與麥佳亞比賽太慢，只打8局，普查安領先5比3，雖然麥佳亞曾追至8比9，但最終都以9比10首圈出局。這場首圈賽事雖然緊湊，但亦令球迷帶來很多歡笑聲，有如「戇豆先生」上身的普查安，一時會皺晒眉「夾死烏蠅」、一時又會齜牙嬉笑，又時會用手敲頭、又會手掌拍胸口，特別是兩次擊球之後，走回球員座位席時竟碰跌水樽，尷尬表情令對手麥佳亞都忍唔住偷笑。

亦可能首次參賽關係，比賽中曾兩次行錯自己座位，普查安賽後幽默咁話：「泰國嘅路出名幾複雜，經常都會行錯路。呢度係克魯斯堡，好明顯我係行錯路。」

這位2010年世界業餘錦標賽冠軍賽後話：「實在好意外，我認為自己只有一至兩成機會可以贏，我希望下場可以繼續打得好，但無論贏或輸，我都一樣開心，我會去享受比賽，亦希望球迷享受我比賽。」

其實，普查安非首次贏「大牌」球員，2011年個人首仗職業賽就擊敗希堅斯，他在賽季主要留在謝菲爾德，並與四名泰國球員同住，當中包括他形容關係是「兄弟」的泰國名將華達拿。

丁俊暉同闖16強

至於中國球手丁俊暉亦闖16強，與普查安為亞洲球手爭光。首節領先7比2的小丁，昨日開賽即被麥文紐斯連追三局，幸小丁及時「回魂」，再下三城贏10比5。

另外「花花公子」之稱的卓林普，周二比賽時亦取消入場背景音樂，以悼念四川地震死難者，他差一點穩袋今年新設的「足金Cue棍」，在第六局轟出一Cue142清枱，刷新一桿最高度數，並以6比3結束首節，而昨日再乘勝追擊，以10比5擊敗戴爾，晉級16強。