湖人又遇阿七魔咒
湖人過到初一，過唔過到十五呢？NBA常規賽昨日「收爐」，萬眾矚目的湖人全靠爵士輸波「帶挈」，成功趕上季後賽尾班車，更隨即於主場擊敗火箭以西岸第七名衝線。「紫金兵團」成功避開雷霆，將於季後賽首圈面對「二哥」馬刺，不過湖人近年慘遭「阿七魔咒」纏身，是福是禍仍屬未知數！
隨住爵士昨晨以70比86不敵灰熊，湖人未鬥火箭已確保季後賽資格，對戰成為名次之爭，因左腳跟腱撕裂提早收咧的「小飛俠」高比拜仁（Kobe Bryant）顯得非常激動，全程安坐家中睇直播的高比透過twitter留言一吐烏氣，更問道：「睇死湖人入唔到季後賽嘅人去晒邊？」繼而又稱：「季後賽承諾兌現，要邁向下一步！」
煞科戰加時贏火箭
湖人士氣大振，昨仗雖一度被火箭的柏臣斯（Chandler Parsons）射入壓哨三分球被追至90平手，需加時再分勝負，但最後仍憑加素（Pau Gasol）貢獻17分、20個籃板球及11次助攻的「大三元」成績，於主場以99比95勇挫火箭，升上西岸第七躋身季後賽。常規賽曲終人散，季後賽首圈將於香港時間周日凌晨開戰，打頭陣將由紐約人惡鬥塞爾特人，至於衞冕的熱火則於周一早上登場撲擊公鹿，但講到季後賽的焦點肯定非「紫金兵團」莫屬！
兩次「阿七」首圈拜拜
翻查歷史，湖人最近兩次以西岸第七種子身份出線都無好下場，分別於2005至06及2006至07年球季不敵太陽首圈止步。湖人下周一凌晨與馬刺於西岸八強首戰硬撼勢必成為季後賽首圈的焦點。
至於被「紫金兵團」踢落第八位的火箭，首圈挑戰西岸「一哥」雷霆，占士夏登（James Harden）倒戈相向同樣備受關注。另外，據《ESPN》報道，前湖人主帥積遜（Phil Jackson）有意於來季重返NBA，但就會轉型以管理層姿態亮相。