斯文OL變身七欖狂迷
好多OL（辦公室女郎）收工後，都會去做運動keep fit，但來來去去只係瑜伽、跳舞、跑步等……嫌唔夠激？有無諗過打欖球呢？雖然外界對「女子欖球」首先會聯想到「大隻妹」同「男人婆」，但曾為香港出戰亞運嘅岑惠心（阿心）同埋劉倩彤（Kim），兩位OL同樣擁有一頭長長秀髮及修長身段，親身粉碎呢個謬誤，仲可以追上今個禮拜嘅「七欖狂熱」添！
阿心正職係保險界嘅理財策劃、而Kim就係OL，兩人喺12年前一個欖球夏季課程認識，之後佢哋唔單止多次入選港隊，更曾亮相亞運會、東亞運等國際大舞台。Kim就話：「欖球帶畀我嘅不只係賽場上榮譽和成功感，還有場外一班好姊妹。」
斷韌帶照撐拐杖入場
欖球畀唔少人認定為「頗暴力」嘅運動，但阿心同Kim心目中它卻擁有着神聖不可侵犯地位，縱使佢哋均先後因欖球而承受過膝蓋前十字韌帶斷裂痛楚，但Kim同阿心就用樂觀積極心態面對，最終克服傷病，重上賽場。
講到最難忘嘅香港「七欖賽」，阿心馬上回想起上年手術後即使撐着拐杖，仍堅持入場睇波情景，佢憶述話：「我用咗45分鐘先走完大球場到中央圖書館短短路程。」雖然辛苦，但阿心當時腦海充斥嘅，卻係觀賞比賽後興奮和喜悅，至於Kim則最記得幾年前嘅球迷裸跑事件。
縱使兩人都因傷無緣今屆七欖，但阿心卻已將目光放喺2016里約熱內盧奧運：「亞運、東亞運等大賽我都試過，只差奧運！即使只係外圍賽都好！」而喺清遠集訓受傷而落選嘅Kim則表示，由於左右腳均曾遭受韌帶斷裂令佢體能下降，應付訓練也頗感吃力，運動生涯或者到咗晚期，但曾出戰各大小國際賽事嘅佢都坦言無憾！
劉倩彤Profile
年齡：26歲
身高：1米66
體重：57公斤
司職：前鋒
岑惠心Profile
年齡：25歲
身高：1米58
體重：52公斤
司職：翼鋒
圖、文：司徒子文、青月