蘭度夫化身愛心教父
「我都想做個好人！」灰熊大前鋒蘭度夫（Zach Randolph）惡形惡相，曾經衰過偷竊、醉駕及企圖販賣槍械，看似係十惡不赦，但昔日年少輕狂的各位又有邊個未做過錯事呢？少年監躉「Z-Bo」為免下一代重蹈自己覆轍，決定洗心革面，自我改造，不但成為模範爸爸，又開OT教後輩打波兼出錢出力參加「拯救鬥牛（梗）行動」，周圍派Love，想做好人？31歲當然未算遲啦！
開OT教後輩做人道理
來自單親家庭的蘭度夫細個家境清貧，試過因為日日着同一條牛仔褲返學畀同學恥笑做「盔甲人」，難忍羞辱決定去超級市場偷褲，卒之「斷正」被判入男童院30日。蘭度夫到17歲又因為企圖販賣槍械幫補家計，結果再次「踎監」。雖然每次犯事都係為勢所逼，但這位灰熊球星就拒絕為自己找藉口，希望用行動教育下一代，避免愛兒Zachariah行番自己條舊路。
「Z-Bo」表示：「我冇老竇為自己樹立榜樣，所以更加明白教仔係幾咁重要！籃球唔係一切，我絕對唔會逼Zachariah去做球星，最緊要係遠離毒品同酒精，積極咁去面對人生。」
蘭度夫要教仔，首要條件當然係要做個好榜樣。據灰熊球會職員所講，「Z-Bo」經常犧牲自己私人時間，開OT特訓陣中小將禾頓（Tony Wroten）及沙比（Josh Selby），而陪練之餘，亦會同佢哋講吓做人嘅道理。
出錢出力拯救鬥牛（梗）
除此之外，蘭度夫不單止在感恩節向孟菲斯貧困家庭派火雞，近日更向新奧爾良一間愛護動物中心定期捐款10萬美元（約77萬港元），拯救一隻「叉錯腳」誤墮水渠嘅鬥牛（梗）。昔日無惡不作，如今就到處派Love，母校馬利安高中更每年舉辦一次「蘭度夫日」表揚這位灰熊球星對社區作出的貢獻。
不過，好心似乎暫時未有好報住，「Z-Bo」所屬嘅灰熊昨日就力戰而敗，作客以91比98不敵熱火，明早再次出擊定必找傷兵滿營的魔術出氣，作客讓5.5分捧上盤。（周一早上7時開賽）
本報綜合報道