周日足球戲碼較弱，所以Peter都係留待周中歐聯先同大家講波經，今就傾吓NBA，現時東西岸各支球隊正努力爭取季後賽資格，令到大部分比賽都好有競爭性，場場都咁好味。特別係湖人及火箭為季後賽資格鬥過你死我活，身為NBA狂迷嘅Peter都大呼過癮。以亞洲嚟講，高比拜仁、勒邦占士及林書豪肯定係最多「粉絲」球員，林書豪譽為亞洲最強球員，高比拜仁就有多枚冠軍指環，兩大主將大鬥法真係好睇過戲。
基於林書豪仲未打過季後賽，佢當然希望可以躋身其中，感受一吓高強度比併。Peter經常強調一點，紀錄嘅開端總係困難重重，但只要林書豪可成功突破困難，對佢往後嘅發展必有幫助。湖人球星高比拜仁年紀唔細，當然會珍惜每一分每一秒嘅比賽機會，以湖人球員質素及高比拜仁優良往績作評價嘅話，若果今次入唔到季後賽簡直係失敗至極呀！
個人睇，湖人攞到季後賽資格機會較高，起碼佢哋球員卡士高啲， 比賽經驗亦比對手豐富，但最緊要係球員唔好喺關鍵時候受傷，如果唔係講乜都冇用。
金句：NBA直路重頭戲，書豪高比雙雄會
黃興桂