以下係流傳喺網上嘅一則笑話。
熱火教頭史普斯達（Erik Spoelstra）為保面子，明星賽前以「自己友」保殊（Chris Bosh）頂替受傷嘅塞特人後衞朗度（Rajon Rondo）正選上陣，希望以熱火「三巨頭」嘅純熟默契，打低西岸隊。點知最後東岸隊都要輸波，認真顏面無存，史普斯達賽後立即同勒邦占士（LeBron James）、韋迪（Dwyane Wade）及保殊開會檢討。
史普斯達：「我要你哋三個一齊落場，就係要贏波，點知你一個係咁射Air Ball、一個係咁畀高比拜仁（Kobe Bryant）Block、一個就四球失誤！」
占士：「對唔住，係我打得太差嘞……」
韋迪：「西岸隊太強嘞……」
保殊：「好彩我之前贏咗投籃之星嘅冠軍，哈哈！」結果史普斯達聯同占士及韋迪將保殊掟落街洩憤……
熱火「三巨頭」傾盡全力竟然出晒醜，先講保殊，上半場已經射出N個Air Ball，然後被基斯保羅（Chris Paul）同柏加（Tony Parker）又插花又「通坑渠」，成為明星賽最「冏」球員；占士則手風麻麻，18射11球「炒粉」，「僅」得19分，最樣衰係最後關頭畀高比連績兩次「Block臭」，真係陰公豬囉！
Kobe「Block臭」「陰公詹」（占士喺海峽兩岸譯名詹姆斯）嘅片段短短幾日錄得近五十萬人次收睇，當中千幾人讚好，令好多「反詹派」叫好，原來暴君唔得人心呢句說話係真嘅！
其實，「陰公詹」可以向前E Kids成員Tommy拜師，唱番首近期本港至強膠歌「踩唔死我」。事關熱火成績喺東岸一枝獨秀，而東岸有能力威脅佢哋嘅得紐約人同溜馬，同西岸隊隊都咁勁完全相反，好大機會爭取二連霸成功。
不過贏到冠軍又如何？「陰公詹」始終得唔到老一輩球星嘅認同，特別係佢偶像「波神」米高佐敦（Michael Jordan），由出道到而家都一直「插」佢。贏咗冠軍但輸晒人心，期望「陰公詹」蛇年洗底成功啦！
邱益忠