大細Ann舞出彩虹

最近有新歌《回家》派台嘅AOA，喺個MV入面同師兄Terry鄒文正有段三角戀關係，仲大騷芭蕾舞絕技。對於自細習舞嘅「大、細Ann」嚟講，拱橋、一字馬等動作可以話無難度，但原來喺一字馬背後，兩人經歷過好多痛苦，仲試過跳到流血添！

「細Ann」諗番起啲受訓往事都好深刻：「芭蕾舞有好多跳躍同轉圈等高難度動作，講求技巧又重視美感，所以訓練特別辛苦。有時對跳舞鞋太硬，搞到起水泡流血都仲要跳！」

講到受傷，「大Ann」就有更痛苦經歷：「有次在北京演出撞到音樂箱，搞到骨裂要長抖！」雖然學跳舞過程有血有淚，但佢兩位都話值得：「經常演出令我哋喺幕前大膽咗，訓練到依家出騷都唔會怯場，係寶貴經驗。」