AOA喜變樂壇大細威
樂壇孖女組合「AOA」嘅Annelle（大Ann）同Annice（細Ann）從4歲開始學芭蕾舞，但今集《萌星動起來》搵佢哋跟香港運動員拜師學藝，佢兩個反而話因為近日禾絲妮雅琪、麥恩萊及蘭度等巨星訪港掀起熱潮而想跟風打網球，所以我哋請咗本港網壇「大悠小柔」陳詠悠、吳筠柔做教練，睇吓AOA有無冇潛力做樂壇靚版「大細威」！
問到點解想學打網球，「大Ann」就話：「之前李娜打入澳網決賽，兩次拗柴都繼續打令我哋好感動，亦令我開始留意呢項運動。原本佢會嚟香港打表演賽，但好似話因為個傷未好番而嚟唔到，真係有啲失望，依家惟有自己落場學吓打網球補番數！」雖然「娜姐」嚟唔到香港打波，但代替佢嘅波蘭好手華雲絲嘉世界排名仲高啲添，呢位溫布頓亞軍將會同丹麥甜心「禾琪」交手，加埋麥恩萊、蘭度兩位經典名宿參賽，難怪「大、細Ann」都話會入場睇波兼偷師學嘢！
入門「三件頭」好快上手
為咗令「大、細Ann」更易上手，我哋搵嚟「大悠小柔」陳詠悠同埋吳筠柔做「網球Miss」，講起「大悠小柔」就巴閉嘞！先講「大悠」陳詠悠家吓係香港首席「土炮」球手，細細個就以打職業為目標，仲考埋獎學金去美國讀大學進修兼打波，又代表過香港打亞運。「小柔」就芳齡15，係本港青年組別「一姐」，前途無可限量。
講咗咁耐課堂終於開始，「大悠」話學打網球冇得速成，只有從基本嘅「三件頭」正手、反手同截擊球開始由淺入深。雖然「大、細Ann」從來未打過網球，但靠住跳芭蕾舞嘅14年功力，打起上嚟絕對唔係「姐手姐腳」，兼且有板有眼，唔使一陣就上手，仲「囂張」到聯手挑戰兩位師傅打雙打添。不過，即使呢對極度似樣嘅孖妹喺場上用埋「移形換影」，都梗係敵唔過「大悠小柔」啦，但「小柔」就大讚兩個徒弟有潛質，話唔定有朝一日會打得叻過佢咁話！
圖／文：司徒子文