陳嘉桓跟操有排玩

兒時仰慕 中國女排

問到點解想打排球，Rose就話：「可能受到中國女排影響啦，其實我好細個開始已經好羨慕打排球嘅女仔，總係覺得佢哋身形修長又靚，打起波上嚟又夠型！讀中學時曾經有Miss見我夠高兼手長腳長而叫我入排球隊，但自己手腳就好似唔協調咁，打波嗰陣隻腳『落地生根』唔識郁，最後都係放棄咗。」

為咗重拾陳嘉桓「那些年」嘅夢想，我哋就搵嚟連續3年稱霸全港嘅龍隊做佢教練，有成班高大猛男陪Rose練波，真係想唔識都難。當中龍隊嘅老大哥鄭偉豪更加係前港隊主力，曾經當選過大專盃MVP，又教過景嶺、聖心校隊，經驗相當豐富。「豪仔Sir」就話要打好排球，基本3招嘅下手、發球同埋救波好緊要，但開始受訓前都要記得做好熱身，仲攞埋條「H梯（敏捷梯）」出嚟訓練Rose嘅下肢靈活性，又可以改善佢手腳唔協調情況，果然夠專業！

陳嘉桓練詠春愈練愈靚女。

龍隊雖係班霸，但喺體壇知名度不高。

有功夫底 一學就識　

經過兩個鐘頭跟操，Rose可以話達成心願，而「豪仔Sir」亦好滿意咁話：「可能佢有功夫底子，所以學打波可以話冇難度，而且一學就識，勁快上手，尤其啲步法同埋救波動作都穩打穩紮，基本功亦練得相當好。」而訓練過後成班身高2米嘅龍隊猛男，都爭相要同呢位明星帥妹合照，佢哋仲話隨時歡迎Rose隨時再嚟跟操，如果比賽時嚟埋打氣，咁佢哋就開心死嘞！

下手	發球	救波

詠春好啱女仔玩

近排忙於為新上畫武打片宣傳嘅陳嘉桓，「打女」形象深入民心，但原來呢位武打新星細個時係弱不禁風：「嗰陣我身子孱弱，企多陣都會暈，於是就索性唔做運動，但自從跟咗師傅（冼國林）練武後就改善好多。其實訓練過程好辛苦，但最後成班女仔竟然只得我捱到依家，呢個絕對意想不到。」

初時因手長腳長而被安排練長拳，但經冼師傅提點後就轉玩詠春，Rose亦話呢項武術啱女仔玩：「有啲女學泰拳Keep Fit，但我覺得動作太猛，唔適合OL，而且猛踢腳會令腳變粗。相反，我練詠春就剛柔並濟，仲可以自衞添！」

港排需要改革

排球喺香港可以話最多人參與嘅運動之一，但論聯賽嘅關注度卻遠遠比唔上足球同籃球。龍隊雖貴為甲一聯賽3連冠，但卻常被傳媒所忽視，教練羅永輝直言要改革：「排球總會真係要做番啲嘢，如改革賽制、增加賽事嘅話題性、多啲向媒體宣傳，咁樣球隊先可以攞到多啲贊助。另外，頭先我同陳嘉桓傾過，都想佢得閒嚟球場支持我哋，就好似依家甲組足球賽都有Baby咁，相信可以令更多人注意到排球運動。」

基本3招包教曉

下手

首先要將手疊埋合起手掌，之後伸直手用小前臂去擊球，記住雙手要壓實肩部，以令到擊球時保持穩定。

發球

先用左手攞住個波，左腳在前右腳在後，右手拉臂，拉開後就揮臂，記住擊球部分係用掌心去擊球。

救波

對手打個球過嚟，我哋就弓字步上前，用右手攝落個波底再剔起，就好似開可樂樽咁，就可以救到波。

圖／文：司徒子文