港隊奪得省港盃，為香港足運打響新年頭炮，省隊教頭曹陽賽後贈言「葉鴻輝可踢中超」，令港方大感興奮，不過，呢句說話等如向婚禮中嘅新娘大讚「你好靚啊」一樣，既然港隊今年捧盃已成定局，輸波嘅省隊當然要抬舉對手，明年大家再拗手瓜。
學某體育品牌廣告話齋「冇嘢係冇可能」，曹陽呢句賽後評語，究竟係門面說話還是真係有可能發生，睇吓有冇中超球會向「英雄輝」招手就清楚晒，事關中超由二○○○年開始實施門將鎖國政策，禁止球會聘用外援門將，目的係希望內地門將多啲上陣機會，培養更多出色守門員，如果英雄輝以香港球員嘅「內援」身份登陸中超，相信比「陳七」北上發展更加震撼。
球員北上發展成為熱話，不過近日一則傳聞就過晒火位，內容係話青島派員來港揀蟀，睇中咗少林寺嘅歐冲同Peter，本來都冇乜嘢，但講到兩人轉會費要成四百萬人仔，咁就離晒題喇！冇錯，歐冲同Peter都係港甲一線球員，但兩人身價冇可能咁貴，事關港甲水平大家心照，波糧又唔高，港甲係好搵嘅話，大把人送個仔入球會學踢波啦！大部分網民嘅反應都係得啖笑，當係一則趣聞咁睇。
由於兩人喺少林寺亦並非必然正選，一旦北上試腳，後果可能變成楊千嬅個friend咁，同個台灣男仔見過一面之後，對方就唔見咗人，仲推搪話台灣Sim卡香港用唔到，余文樂一腳踢爆，仲一路笑一路話「佢畀人彈鐘呀」，咁就無謂啦！