安東尼鬧婚變又遭停賽，「甜瓜」變「苦瓜」！紐約人日前作客被「綠軍」塞爾特人砌低，敗走的安東尼更被「KG」加納特「廢噏Trash Talk（垃圾話）」影響表現，當中難聽的說話包括：「你老婆嗒起上嚟，好似蜂蜜燕麥圈嗰種味道」，被挑釁的「甜瓜」事後還想搵「臭口KG」隻揪洩憤，終在昨天被聯盟宣布停賽一場。而這場罵戰，亦揭發了一場婚姻危機，原來安東尼兩公婆已分居，難怪「甜瓜」怒火中燒！
正所謂崩口人忌崩口碗，本來Trash Talk在籃球場上好常見，不過美媒就在事發後明查暗訪，踢爆原來安東尼兩公婆出現咗感情問題，唔怪得安東尼咁躁啦！據《紐約每日新聞》報道，真人騷女星La La元旦日在南佛羅里達州開狂歡Party，不但沒有相約另一半安東尼一齊玩，就連結婚戒指都除埋，從而揭發兩公婆原來已經分居超過兩個月，婚姻亮起紅燈！話說其實「甜瓜」已十分努力去挽救關係，但La La始終不願意返屋企。加上La La今季鮮有入場睇波撐老公，twitter留言亦甚少提及安東尼，二人濃情轉淡，冰封三呎，非一日之寒！
上仗「臭口KG」加納特偏偏在安東尼傷口灑鹽，搞到「甜瓜」失控幾乎想打架，氣沖沖地於賽後走到更衣室附近的球員通道、甚至停車場等「KG」，結果要保安及工作人員介入。衝動的「甜瓜」終被聯盟罰停賽1場，今早造訪溜馬場波無緣披甲。家陣安東尼成肚火，明天復出相信會找公牛出氣，因此紐約人主場讓3.5分一於捧上盤。此事亦令開季至今表現突出、平均每仗29分及6.1個籃板的「甜瓜」，爭取MVP的前景蒙上污點。