韋迪閃電行善賑災民

上月初在哈倫代爾發生的一場火災摧毀一間海灘房屋，韋迪知道後，日前唔聲唔聲自掏荷包買齊傢俬及電器送到該戶民居，仲落手落腳幫原本燒到熔熔爛爛的住所進行翻新工程，助受災家庭可以開開心心迎接新一年來臨。受災家庭成員見到韋迪簡直不敢相信，紛紛要求和他合照，「閃電俠」來者不拒盡顯親民形象。

不過，韋迪上周怒踢山貓控衞沙斯安斯下體後，雖然接受聯盟處分停賽一場，但昨日就宣布會提出上訴，誓要討回被罰的15萬美元（約117萬港元）人工和個人名譽，擺明「唔肯認錯」！

講起熱火，近日不少美媒報道這支衞冕總冠軍可能向帝王的「麻煩中鋒」古辛斯埋手，力圖加強內線實力。

快艇再打「爵」17連勝

至於西岸勁旅快艇則持續勇態，昨日憑卡朗畢拿喪入六個三分波，主場以107比96再勝爵士連贏17場，單計12月份戰績更是繼71年湖人及96年馬刺後，首支能夠在單月錄得16戰全勝的隊伍。快艇狀態當勇，明早造訪金塊讓4.5分照捧上盤。

（now 635周三早上10時直播）