尼古恩陪你倒數
被譽為史上最靚仔體操明星嘅德國體操運動員尼古恩（Marcel Nguyen），應邀來港出席連串宣傳活動，包括與香港fans齊倒數迎接2013，呢位於倫敦奧運連奪全能及雙槓兩面銀牌猛男，昨日偕家人及女友抵港，開始旋風式訪問，身材健碩嘅尼古恩步出機場時更身穿一件闊領低胸tee，露出部分紋身，冧爆現場女fans，呢位靚仔嘅電力果然名不虛傳。
低胸騷肌 笑容殺人
25歲嘅尼古恩為越南同德國混血兒，代表德國出戰奧運之後，就成為世界各地女fans寵兒，就連前港姐李珊珊都發微博，熱烈歡迎尼古恩嚟到香港。尋日赤鱲角機場亦吸引咗幾十位fans接機，當中佔咗九成為女性。雖然等行李近一小時先至出閘，但個頭Jel到「行一行」嘅尼古恩就冇令大家失望，佢身穿一件超低胸tee，露出胸前紋身，一見到fans就露出殺死人嘅笑容，之後簽名同合照都絕無托手o架，認真識做。之後佢接受訪問時，就話對於熱情嘅香港fans感到好意外：「好開心可以嚟到香港，我真係無諗過自己會有咁多fans。」
家姐宣傳 女友怕醜
為咗幫尼古恩宣傳，佢嘅家姐Denise專登去學中文，仲幫細佬開咗一個微博，實行同粉絲多啲交流，尼古恩話希望今次有機會一家人上山頂，欣賞維港夜景。至於尼古恩女朋友Alexa亦有同行，不過靚女就好怕醜，唔想接受訪問。
今日尼古恩會現身尖沙咀出席公開活動，與fans全接觸，包括與本地體操運動員示範交流，以及進行擊掌會，為香港掀起一股尼古恩熱潮。
