桂華山今爭王搶后
全港學界精英籃球賽昨日假蒲崗村道體育館上演四強戰，男子組以中華基督教會桂華山中學與拔萃男書院交鋒最為精彩，兩隊激鬥四節打成39比39平手，加時階段桂華山先以一記三分球拉開比數，最後桂華山以49比45險勝男拔，今日移師青衣體育館於決賽火併遵理學校。桂華山的女子隊都唔輸蝕，以55比28擊敗匯基書院（東九龍），將與協恩中學對決。桂華山男女子隊有望在今稱王封后。
翁金驊：男隊要多啲決心
桂華山教練翁金驊希望球員能夠做好自己，發揮應有的水準：「其實男子隊係第一次打入精英賽決賽，我覺得佢哋喺今年精英賽算係黑馬，之前都有預計可以走到呢步。佢哋射罰球嘅準確度有進步，期望再畀多啲決心爭勝，以及咪打得太過個人主義，要打出團結精神。至於女子組，完全係上年決賽翻版。雖然未必夠對方打，但都想佢哋喺比賽中吸收多啲經驗。」
桂華山男籃隊長鄭堯徽表示贏得驚險：「其實我哋喺身高、體形都較男拔輸蝕，所以今次都贏得頗幸運。最後要同遵理爭冠軍，都算幾難得。我覺得都要特別小心『得分王』梁兆華，同埋對方每個位都『齊腳』，我都會出盡全力比賽，希望可以奪冠。」
桂華山女籃隊長王家怡透露，連日賽事令她們略感疲倦：「其實我哋連續打咁多日，或會體力不支，加上我哋正規球員只得5個，始終不及協恩咁齊人。但我哋都會盡力應付，就算唔能夠成功衞冕，攞到亞軍都已經滿足！」