前日全球熱話都圍繞末日論，如果前日真係末日嘅話，各位波友又會選邊個做今季ＭＶＰ呢？
（一）熱門選擇：安東尼（紐約人）、杜蘭特（雷霆）
「甜瓜」安東尼今季平均攻入28分，當中三分波命中率係歷來最高嘅45.8％，起手同入波次數亦係歷來最高嘅5.7次同2.6球，同以往一場都入唔到一球嘅表現相差好遠。最令筆者讚賞嘅係，安東尼終於願意將球權交畀隊友，證明佢心智比以前成熟好多。
自從老死占士夏登遠走火箭後，杜蘭特改變打法，除咗得分維持27.9分嘅高效率表現外，平均助攻亦提高至歷來最高嘅4.2次；間中兼職大前鋒亦令杜蘭特平均籃板球達到非常恐怖嘅8.4球。
（二）穩陣選擇：勒邦占士（熱火）
2012年一口氣奪取ＮＢＡ總冠軍同奧運冠軍後，占士成功反擊外界對佢嘅質疑，不過一眾「反大帝派」球迷，會由詛咒佢係「無冕王」改為「一冠王」，繼續Dislike佢。平心而論，占士平均25.2分、8.5個籃板球同6.8次助攻嘅全能表現，絕對令人心服口服，唯一影響占士成為ＭＶＰ嘅因素，相信係佢唔夠七成嘅罰球命中率吧！
（三）超冷門選擇：傑特（紐約人）
平均8.6分、4個籃板球和3.9次助攻可以成為ＭＶＰ候選人，Are you kidding me？冇錯，筆者認為紐約人今季一躍成為東岸勁旅，傑特臨老先改造為三分球射手，佢瓣瓣都有，「神奇叔叔」好勁呀！
邱益忠