棄「開槍」慶祝諾亞有好報
美國康涅狄格州紐敦鎮校園槍擊案引來全球關注，繼早前一眾NBA球星以不同形式作悼念後，公牛中鋒諾亞亦決定停止「開槍」嘅招牌慶祝動作，避免球迷想起呢宗慘劇。而諾亞昨日對塞爾特人就造出「大三元」，協助公牛贏波，可謂好心有好報。不過，英超曼城球星史葛冼佳亞嘅女友就認真「腦殘」，竟然玩用槍指住自己個頭，仲影相放上網博出位，搞到畀全英國口誅筆伐，只能講句「真係蠢到冇人有」！
公牛中鋒諾亞一向形象粗獷，但其實好有善心。自槍擊案發生後，諾亞就宣布不再以「開槍」方式慶祝其跳投得分，原因係避免呢個慶祝動作令人聯想起慘劇。
事實上，諾亞喺槍擊案發生後已喺twitter表示支持美國嚴格管制手槍嘅使用，縱然佢生於紐約，但由於父母係來自法國和瑞典兩個嚴格管制槍械嘅國家，所以佢亦唔反對管制槍械嘅建議。
史葛冼佳亞女友借慘劇出位捱轟
諾亞作出停止「開槍」慶祝方式嘅決定後，喺公牛昨日主場對塞爾特人造出職業生涯第二次「大三元」，貢獻11分、13個籃板同10次助攻，協助球隊以100比89擊敗對手，報回上次一敗之辱，難怪有球迷話呢位籃板王好心有好報。
諾亞放棄「開槍」慶祝方式，只為避免人們想起槍擊案慘劇，但偏偏有人就要借呢件事博出位，講緊嘅係英超曼城球星史葛冼佳亞嘅女友海倫法拿根（Helen Flanagan）。呢位英國《真人騷》姐仔日前喺首位槍擊案小童受害者葬禮舉行當日，竟將一張用槍指住自己個頭嘅相片放上twitter，結果惹來全英口誅筆伐，被指「超級愚蠢」同博出位。
不過，海倫法拿根則大呼冤枉，強調自己唔係對槍擊案遇難者不敬，更指自己當日宿醉，更覺得依家畀人欺凌。無論如何，喺呢啲敏感時刻做一啲會挑起受害人或家屬身心受創嘅行為，只會被視為愚蠢同博出位，海倫法拿根呢趟真係水洗都唔清啦！