西岸球隊勇士昨在主場以103比96擊敗黃蜂，繼續贏到開巷。勇士今季戰績起飛，季票銷量短時間內激增，成功突破1萬大關，同湖人、馬刺等一線勁旅睇齊。有見及此，會方最近推出過癮Figure，更出動史堤芬居里及奇利湯臣兩位美男子拍聖誕廣告勁冧fans。
勇士早前創球會紀錄締造客場6勝1負佳績，季票亦自12月6日開始狂賣700套，成為聯盟今季八支賣出超過1.1萬套季票球隊之一。連續七季場均入座率突破1.8萬人次，亦令勇士與紐約人、馬刺及湖人睇齊，「升呢」躋身聯盟最受歡迎隊伍行列。
為報答fans，勇士早前趕製一系列球員Figure免費派發，最近又出動史堤芬居里及奇利湯臣兩位俊男拍攝聖誕節宣傳片，當中二年生奇利湯臣連家傳戶曉《Jingle Bells》都忘記歌詞，假鹿角又猛甩，Cute爆演出勢必冧死大批女粉絲。