佐敦教班o靚fadeaway

49歲「波神」出山救亡!東岸球隊山貓近期輸波停不了,老闆米高佐敦終於「睇唔過眼」,昨日親自落場傳授「神技」,久違了的fadeaway重現眼前,表現比謝勒軒達臣及榜眼基爾基士堤等一眾後生仔更sharp醒,難怪連球隊中鋒比約保都講笑,叫「波神」不如復出啦!

波神出招哄動訓練場

未計今早鬥快艇,山貓最近已經連輸八場,球隊管理層已啟動緊急應變措施,先有總裁洛希堅斯裁走表現不佳的親生仔哥利,繼而就輪到教練鄧普洛變陣出擊,豈料連老闆「波神」亦要出動!佐敦昨日一身運動look出席山貓的操練,起初只於場邊督操,但眼見一班契仔表現「唔多掂檔」,終於忍唔住親自落場露兩手,惹來大批記者及球員圍觀。

明年2月就50歲的「波神」身形未有太大走樣,甫落場就與隊長謝勒軒達臣玩「One on One」,並施展渾身解數使出招牌式fadeaway及「遮住半邊波」出手等招牌性射姿,招招都是陪伴着各位籃球躉成長的殺着。「波神」之後再單挑應屆榜眼基爾基士堤,跟手就教特魯斯湯馬士及比約保步法及背籃功,身為班主一樣毫無架子。

訓練結束後謝勒軒達臣向傳媒表示:「我哋冇計分,但比數應該差唔多,米高依然擁有得分能力。」至於中鋒比約保就最識擦鞋:「老闆仲好弗,依家復出應該仲打得!」隨着謝勒軒達臣傷愈,山貓戰鬥力自然提升不少,加上有「波神」傳授秘技,試問一班手足又點可以令老闆失望,明早造訪鷹隊照計有得鍊,受讓6.5分要下盤。

(周五早上8時30分開賽)

高比42分仍負騎士

另外,湖人縱有高比拜仁貢獻全場最高42分,成為現役球員當中獲最多「40+」球員(115次),但球隊一樣難逃敗局,作客以94比100不敵有艾榮復出的騎士,連輸三場。翻查數據,「小飛俠」今季十一次攻入「30+」,湖人就輸足十場,認真邪門!湖人明早造訪東岸「一哥」紐約人睇怕都冇運行,後者小讓2.5分要上盤。(now 635台周五早上9時直播)

本報綜合報道