教頭史葛瘋狂搞鬼

唔知係咪因為最近連輸5場,加埋台柱艾榮及射手維特斯相繼「打柴」,騎士教練史葛竟然行為失常,記者會上搶接記者手機、公然質疑聯盟執法水平仲未夠皮,更強迫陣中新仔扮小學雞,唔通史葛真係Short咗?

雖然玩新人乃NBA傳統,但多年來皆由球員負責,今次史葛就親自出動,勒令陣中新仔包括維特斯、施拿及奇雲鍾斯扮小學雞,強迫3人無論出戰主、客場賽事都要孭上粉紅色背囊兼推BB車報到,當中奇雲鍾斯就向傳媒大吐苦水:「BB車上面有個洋娃娃,背囊入面就要長期裝滿紙尿片同奶樽,係會畀人笑o架啦,但如果唔服從就有排受!」

衰多口唔見19萬

史葛嘅失常嘢陸續有嚟,上周四出席記者會時,就搶接一位女記者放在枱上嘅手機猛咁吹水。雖然佢賽前勁風騷,但當騎士不敵木狼之後就即時變臉,暗示聯盟有「黑哨」:「大家都係剷籃次數差唔多,但木狼就有39個罰球,我哋就得9個,講唔通囉。」質疑聯盟執法,史葛昨日終被秋後算帳,被NBA罰款25,000美元(約19萬港元)。

騎士「輸」到開巷,慶幸陣中王牌艾榮已經復操,明早主場對湖人有望聯同傷愈嘅得分後衞維特斯復任正選。湖人無疑牌面秤先,但昨日主場以110比117不敵爵士,近6仗有5場失分過百,呢場未必能夠大炒騎士,騎士受讓3.5分要得過。(now 678周三早上8時直播)

另外,安東尼復出倒戈交足貨,交出全場最高嘅34分,助紐約人主場以112比106擊敗舊會金塊,主場8戰全勝。紐約人氣勢如虹,明早造訪籃網合演「紐約打吡Round 2」,當然想報一箭之仇,紐約人讓2.5分值博。(now 635周三早上8時直播)

本報綜合報道