活塞捧入波男做新Icon

爸爸Ed打美式足球四分衞、媽媽是籃球員，來自體育世家的辛格拿，自杜克大學時期已有鋪花式投籃癮，兩條精心炮製的投籃短片都在Youtube獲得過百萬點擊率，星味、戰績欠奉的活塞當然食住上，球會公關部早前就推出一條辛格拿的短片，幫這位「The Bucket Man（入波男）」谷人氣。

辛格拿贏得「入波男」美譽，皆因他無論用腳踢、後手投射、借用車頭擋風玻璃反彈籃球都一樣射親都入，神乎奇技片段熱爆籃壇。有見及此，活塞已有一連串大計捧紅辛格拿，近期更頻頻派他出席球會公開活動，希望自比立斯帶隊奪得04年總冠軍後，再打造底特律體壇新Icon。

出任正選腳頭好

場外花拳繡腿，場內就實而不華。雖然辛格拿的9.9分及3.5個籃板場均數據並不標青，但隊友韋爾拜林就稱：「辛格拿不斷奔跑拉開對方球員，帶挈我哋有空位剷籃，呢啲嘢唔會喺數據上睇到，但籃球IQ高嘅球員都會認同辛格拿係好嘢！」

自從上月中躋身正選後，辛格拿協助開季8連敗的活塞錄得6勝6負成績，好腳頭定會獲教練法蘭克繼續重用。去季停擺期間到西班牙搵食的辛格拿稱：「攞幾多分唔重要，最重要係識唔識點打場波，西班牙聯賽嘅球員從來唔係靠大隻同速度，佢哋打波係食腦，喺西班牙起步令我獲益良多。」辛格拿令活塞重上正軌，明早造訪有艾榮及維特斯倦勤的騎士可秤先，受讓1.5分要下盤。（周日早上8時30分開賽）