吳安儀離「三連冠」只差一步，呢位上個月先滿廿二歲嘅香港「Cue后」，尋日喺保加利亞舉行嘅世界業餘桌球錦標賽，以4比2淘汰泰國球手絲拉法殺入決賽，將同比利時名將珍妮絲爭奪錦標，力圖三登后座追平「女版奧蘇里雲」伊雲絲嘅成就。
早前贏得英國職業賽桂冠嘅吳安儀，闊別賽事一年後重返世界業餘桌球錦標賽場仍然保持高水準，喺分組賽四戰全勝僅失一局晉級，進入淘汰賽階段更愈戰愈勇，四強與絲拉法激戰六局後成功奏凱，再次躋身決賽。
由於呢項賽事去年不設女子組賽事，所以吳安儀只要擊敗同日贏波嘅珍妮絲，就可以繼2009及10年後連續三屆封后，決賽將採取九局五勝制。
另一邊廂嘅全英錦標賽，中國「天王」丁俊暉持續低迷，以4比6不敵威爾斯名將賴恩戴爾，三十二強止步，睇嚟佢狀態認真麻麻。「小丁」同胞梁文博亦以4比6負於鶴健士，同樣「一輪玩完」；反觀希堅斯、沙比及麥佳亞等名將就順利打入十六強。
（now 637周一晚9時及周二凌晨3時直播）