拓荒者嘅列拿特今季以第6號新秀進入NBA，表現大受好評，更喺新秀榜一直領先狀元安東尼戴維斯。列拿特今季到依家上陣17場，每場平均貢獻18.8分、6.2次助攻以及3.3個籃板球，成為最炙手可熱嘅新人，不過呢位曾揚言可以「打爆」拿殊嘅花靚仔，原來患有一個怪病，就係「雕像恐懼症」，列拿特話自己連墓地都唔敢去，因為嗰度通常都會見到耶穌嘅雕像，會嚇親佢喎，真係估佢唔到！
拓荒者早前作客巫師嘅前一日，列拿特專登揸車逛吓華盛頓，點知就咁出事，畀當地歷史博物館嘅雕像嚇親。列拿特喺twitter話：「我想下次再嚟參觀紀念館，即使我係面都青，但其實我只係驚嗰啲歷史性雕像，例如林肯、馬丁路德金等，因為我喺蠟像館有過一次恐怖經歷。」
列拿特唔知自己幾時患上呢個「雕像恐懼症」，只係記得兩年前夏天參觀過一次蠟像館：「最後一個展館放咗個奧巴馬、林肯同華盛頓蠟像，佢哋睇嚟同真人一樣咁大，而且間房仲有音樂，所以我畀呢個環境嚇咗一跳！」
列拿特之後再講自己其他經歷：「由嗰陣時我就好驚歷史雕像，我喺波特蘭揸車會專登繞過墓地，因為嗰度有一尊耶穌像同埋佢隻手，我見到會好驚！唔知點解一見到呢啲歷史偉大人物時我就會咁，對我嚟講真係非常傷腦筋，因為我又要驚又想睇。」拓荒者作客巫師一仗結果輸波而回，未知列拿特係咪驚魂未定影響演出。
不過，列拿特尋日朝早就大發神威，貢獻24分及11次助攻，協助拓荒者作客打到雙加時以118比117險勝騎士，唔知係咪同騎士所在地克里夫蘭冇歷史雕像有關呢？聽朝拓荒者會繼續其作客之旅對山貓，睇嚟球隊高層都係叫列拿特乖乖留喺酒店，唔好周圍貢啦！