歐陽若曦揚威東望洋
香港車手歐陽若曦揚威濠江！於FIA世界房車錦標賽東望洋大賽，有別於早兩年被其他車手波及被迫退出，今年歐陽若曦（Darryl）受惠於其他車手意外，兩個回合都贏得獨立盃冠軍，今個賽季首次企上頒獎台，他表示會將獎盃獻給日前炒車逝世的丘永材及其家人。
歐陽若曦兩年前開始轉攻房車賽，但一直於東望洋賽道都不及之前的保時捷成績，連續兩屆都被其他車手意外波及退出，但「敗也意外、成也意外」，今年於澳門兩回合賽事，Darryl卻受惠於意外而取得獨立盃分站冠軍。首回合Darryl排第六出賽，於獨立盃車手中則排第一，佢起步後攀上第五，第一圈經過葡京彎後，Darryl後面兩架車發生意外造成阻塞，令前面五架車走甩晒，歐陽若曦輕鬆完成賽事，而第五名過終點，獨立盃車手中最快完成比賽，成功贏得今季首個分站錦標。
到第二回合，Darryl喺總共九個圈賽事去到第六個圈仍然排獨立盃車手第三，點知前面兩架分別為匈牙利車手米捷列斯及西班牙車手奧拿相撞，無啦啦益咗Darryl，再度
贏得分站冠軍。
澳門兩回合比全年贏得更多
歐陽若曦賽後表示很開心，因為今季賽事成績一般，笑言今站兩回合已經比之前全年獲得更多，佢話返到澳門比賽，係自己地方，會特別努力。Darryl以冠軍作為今季收咧戰，佢話攞到冠軍，對於明年搵贊助及車廠有好大幫助，明年仍然會集中於房車賽，但於一月會參加一個耐力賽，三月再上征途，回香港會先同太太及車隊慶祝，跟住會同太太去南非旅行充電。
Darryl又特別指出，希望將兩回合獻給日前身亡嘅香港車手丘永材及其家人同車隊，他話雖然二人不認識，但賽車界圈子很細，知道他是一個好車手，但Darryl指丘的意外冇影響自己作戰策略，於文華東方彎並冇特別收慢。
侯夫奪世界房車賽總冠軍
喺Darryl贏得獨立盃嘅同時，FIA世界房車錦標賽總冠軍同時誕生，開賽前於總分領先嘅英國車手侯夫，雖然首回合炒車一分都攞唔到，但次回合取得第二位，令佢奪得個人首個FIA世界房車錦標賽總冠軍。
周兆年、黃兆崑澳門直擊