儘管熱火係我最撐嘅東岸球隊，但紐約人今季走勢非常凌厲，球隊幾個38至40歲嘅老將「愈老愈可愛」，在史杜迪米亞缺陣時教練活臣變陣，派「神奇爹哋」傑特擔任得分後衞，安東尼打4號位，依然火力十足，頭7輪戰績6勝1負，「12‧21」世界末日如果不來臨的話，我諗紐約人仍會係東岸成績最標青嘅球隊。
紐約人陣中有多個差唔多「四張嘢」嘅老將，搞笑分子拉舒華萊士，同我一樣係38歲，但活力依然，至於再大1歲嘅傑特更令我汗顏，打正選不特止，更改打得分後衞，每場平均得分有8.6，其中3分命中率超過56%，相當厲害。費頓、甘比喺攻防都發揮不俗，仲有JR史密夫，以及另一新簽嘅阿根廷控衞比真安尼，此子35歲才做「NBA新秀」，燃點咗唔少「老」球員嘅希望，只要打得好總有出頭天。
安東尼嘅神勇亦抵讚，佢打大前鋒雖然身材係矮啲，但勝在靈活，頻頻走出來射3分「食胡」嘅打法，已演繹出大前鋒嘅新Style。而香港籃球隊本月22日亦展開集訓，到時會重召「老」將，為明年初嘅港澳埠際賽同超級工商盃做準備，作為教練團嘅一分子，我哋決定重召潘志豪等入隊帶領新人，喺周健宏及羅意庭等重心球員不在港期間填補缺口，畀新一代港隊有學習機會。
擔任港隊中鋒逾10年，近年教波領港隊及永倫征戰，中港電視台球評家，堪稱籃球萬能俠！