NBA選‧薦風雲

《ESPN》早前炮製「大帝狂想曲」漫畫，預言勒邦占士未來仍會帶領熱火獲得更多冠軍指環，反映圈內普遍認為一隻指環並非大帝嘅句號，而是另一神話嘅開端！三位識波之人同意嗎？

蔡：我睇好熱火，除咗重心球員First Five冇太大改變，最好一樣嘢係加入咗雷阿倫呢位穩定嘅三分射手，仲有劉易斯可打3、4號位嘅球員，呢對超音速嘅前「孖寶」，雖然年紀大咗但肯定幫到手。雖然冇中鋒，但睇奧運Dream Team都唔需要中鋒，明星賽選舉今屆連中鋒位置都唔要，意味講求速度、體能先係主流，亦可彌補高度嘅劣勢，所以我認為熱火有機會挑戰常規賽72勝。

貝：好認同蔡Sir睇法，熱火喺東岸一枝獨秀，可威脅熱火一係公牛、一係塞爾特人。公牛過往最強嘅地方係有一班好好嘅後備軍團，但今年簽入嘅尼特羅賓遜、穆罕默德等，實力夾唔夾到呢？同時戴歷羅斯又可能下年二月先復出，所以今季公牛同熱火嘅實力可能拉開咗。不過戴歷羅斯打少啲常規賽，從慳體能嚟睇未必係壞事，因為上年打66場，今年82場，相差16場好大分別。黑心啲講句，公牛想贏熱火，可能要寄望三巨頭其中一個有乜「冬瓜豆腐」。

戴歷羅斯似足法蘭斯

邱：戴歷羅斯膝頭十字韌帶斷裂，情況似足十年前嘅Steve Francis（法蘭斯），傷前又搶籃板又切入攞分，但傷後表現直滑，我擔心戴歷羅斯今次出嚟只係廣告商效應考慮。

貝：戴歷羅斯一定會喺中長距離射波作出改善，佢再上一季嘅三分波，比之前入多好多，睇得出佢想改變打法，唔單只坦克車咁剷入去，有時要做急停跳射或外投，以減輕負荷。

蔡：咁我支持嘅熱火就有機會喇，哈哈哈！

邱：咁塞爾特人又擔唔擔心呀？

蔡：鐵三角拆散後，ＫＧ加納特係我好鍾意嘅一個球員。但真係嘆一句敵不過時間，你有無限鬥志，但冇無限嘅體力，有好多動作係做唔到嘅。雖然佢哋有謝夫格連，但補充唔到內線嘅得分能力。

貝：塞爾特人以往比較慢，今年謝夫格連出番嚟，泰利呢啲攞住個波會打快啲。打慣慢波嘅皮雅斯同ＫＧ加上一班想打快嘅，呢個磨合會係點呢？真係要拭目以待。

邱：好擔心「綠軍」去到季後賽冇力，我見唔到佢哋後備有中鋒，唯一好處係泰利成為熱火嘅夢魘，當年占士去熱火攞到亞軍，就係因為泰利射死咗佢，我希望泰利畀到壓力熱火，唔好畀熱火一枝獨秀，否則東岸好悶o架。

西岸情況又點睇？

邱：我就撐湖人嘞，佢哋今年加咗杜域侯活配合加素，令佢哋喺禁區能力超強，個人好鍾意嘅拿殊亦過檔湖人，唯一擔心Kobe好似皇帝咁唔肯交波，同時亦睇好佐敦希爾呢任藍領級球員。

蔡：等我辣着火頭先，雖然湖人組成一個BIG4甚至BIG5陣容，但個波喺邊個手先？38歲嘅拿殊呢幾場季前賽一上場就喺咁攻，Kobe完全冇機會掂波。高比係一個要掂住個波做假動作，個人上籃攞分嘅球員，如果要佢變做得分後衞咁，不斷走位搵單擋，攞完個波就射，呢個唔係佢風格，所以我覺得拿殊同高比夾唔到。

高比想贏先問杜蘭特

貝：籃球是隊際運動，但湖人呢班球員嘅化學作用仲未清楚。04年湖人「四大天王」模式都試過，卡爾馬龍都去過洛杉磯幾年，對住活塞都冇表現，今年潛在類似一個問題，不過湖人要突圍，仲要過杜蘭特領軍嘅雷霆呢關。

邱：雷霆嘅杜蘭特（ＫＤ）係一個無私嘅得分王，願意交波畀隊友射，但關鍵時刻要佢做救世主，佢都係畀韋斯布克起手。以前大帝（ＬＢＪ ）都有呢個問題，結果被球迷鬧到「豬頭炳」點解王牌唔挺身而出？呢一點ＬＢＪ同ＫＤ都不及KOBE。

對林書豪嘅期望．．．

蔡：兩個字「擔心」！我睇到佢最大嘅弱點，就係左手突破分波一直未有改善，同頂級嘅後衞傑特甚至拿殊相比，J.Lin嘅控球始終差咗兩班。

貝：我覺得似乎係商業決定！

邱：火箭搵林書豪頂姚明個位，霸佔華人市場！J.Lin攞15分同8個助攻唔難，但問題係用咗幾多進攻機會呢？可能得3成命中率先攞到呢個分數，其間可能仲有6、7個失誤。夏登去到火箭，對火箭戰績有一定幫助，但係又會帶出一個好微妙嘅問題，究竟佢會唔會同林書豪爭做大佬呢？「雙J」組合嘅特性，好似以前勇士Ellis（艾利斯）同Curry（史堤芬居里），兩個矮小嘅後衞個人數據亮麗，不過我估火箭戰績約30勝。

三位專家個個Point都咁有見地，球迷們，記住黐實「3巨頭」專欄喇！

貝可泓

超級體育迷及now TV新一代「全能」球評家，曾赴笈加拿大，熟悉北美體壇，籃、足、冰球、棒球、歐洲波通識，目前是公民教練及行政總監，也是預備組球員，鍾意落場打埋一份！

蔡芳裕

憑6呎6吋巨人身形，擔任港隊首席中鋒逾10年，近年拚而優則教，帶領港隊及永倫征戰，加上口才了得兼任中、港電視台球評家，堪稱籃球萬能俠！

邱益宗

過去15年睇波睇到入血，唔講唔舒服，台灣《美國職籃》作家，筆風幽默帶點意識流，隨豐富想像窺探球賽新趣味，非典型80後波癡！

圖:司徒子文

文:葉菁菁