講到新人，黃蜂今季簽入嘅「一字眉狀元」安東尼戴維斯勢必勁爆登場，邱益宗都睇好呢位防守突出嘅大前鋒：「安東尼戴維斯幾似Marcus Camby（甘比），射程幾遠，防守突出，尤其是封波最好，我估計場均有兩球以上，睇好佢有九成機會攞新人王。」而蔡Sir就對「一字眉」嘅力量型進攻最深刻：「我評述奧運時睇過佢，另外睇過佢大學比賽片段，進攻上佢離框五至六呎一樣「拆你屋」，不過低位進攻仲未得。佢應該喺籃板同得分要做到double double先襯得起狀元嘅名聲。」
貝可泓就推介波士頓20歲新人大前鋒蘇寧加：「佢嘅籃底爆發性強，係一個非常體力型球員，會大力入樽，可能有啲驚喜畀大家。」