今屆奧運女足決賽的戲碼，係上年女子世盃決賽翻版。世盃盟主日本儘管於四強戰尾段備受壓力，憑住「女保方」福原美穗的神勇演出，以2比1擊敗法國，首度進身奧運決賽。而衞冕的美國則食盡驚風散，於加時最後一刻靠雅歷絲摩根的頭槌絕殺，以4比3險勝加拿大，一眾「美女」士氣如虹，誓要搵「瀛女」報番去年一箭之仇。
單從27比4的射門數據，就知法國於準決賽住日本來攻，不過「瀛女」勝在效率高，靠大儀見優季同阪口夢穗的入波，早早領先兩球。之後法國傾巢而出追番粒，可惜布莎莉亞的12碼宴客，加上日本門將福原美穗力挽狂瀾，最終日本保住2比1的勝果。賽後媒體大讚呢位門神為「女保方」，面對法國11次中框的攻門只失一粒。
另一邊廂，美國同加拿大合演一場峰迴路轉的準決賽，加軍有姬絲甸冼佳亞連中三元，美國靠娜賓露同雲芭芝三度扳平，直至加時最後一刻，「轟炸機」雅歷絲摩根一記頭槌絕殺，協助「美女」以4比3險勝對手。
自從美國上年於世盃決賽互射12碼輸畀日本後，至今仍耿耿於懷，一直期待能在奧運搵「瀛女」復仇，如今「美女」闖入巔峰對決，亦為決賽添多一分火藥味。