終其一生，或者只有一次機會踏上奧運舞台，但作為一個媽媽，冇嘢重要得過自己仔女，故此一個「媽媽奧運選手」所流嘅血汗、要作嘅犧牲，實在不足為外人道。今屆倫奧就有多位偉大母親，忍受各種痛苦而為子女而奮勇作戰。老套啲都要講句：「世上只有媽媽好！」
澳洲著名女泳手妮絲鍾絲生完仔，未能趕及收身就要出戰奧運游泳項目，佢着泳衣嘅「脹爆」身形，即成為網民嘲笑對象，揶揄佢以重量級身形參戰，實在太荒謬，甚至話睇妮絲鍾絲比賽，簡直係虐待雙眼。不過，妮絲鍾絲懶理外界「噪音」，忍辱負重參賽。因為佢深信仔女永遠比獎牌重要，自己為小朋友而戰，就算身材因為生仔而走樣，甚至影響成績，亦在所不計，盡顯母愛嘅偉大。
成績：4×100混合泳接力銀牌
馬來西亞射擊選手泰比懷住八個月身孕，參加今屆奧運，佢原本獲得10米氣步槍及50米步槍三姿比賽資格，但因為呢位29歲嘅大肚婆唔可以做出臥射動作，惟有放棄步槍三姿，仲要代表團準備專科醫護人員，隨時為佢接生。而泰比一比賽完畢就要立即回國準備臨盆，連閉幕禮都去唔到，犧牲真大。
成績：10米氣步槍初賽（392環）
現年37歲的體操選手卓蘇維迪娜於92年首次征奧，已為前獨聯體取得金牌，之後又代表哈薩克，並下嫁哈國摔跤運動員，冇耐仲生埋個仔添。但好景不常，其子竟身患頑疾，之後卓蘇維迪娜為愛兒到處奔走，不斷參加比賽搵錢救兒。今屆佢以高齡代表德國出戰倫奧，贏得業界一致尊重，愈來愈多同行捐錢畀佢救個仔，令人非常感動！
成績：體操跳馬決賽
咪睇「阿金」外表剛強，但每次面對4歲女兒，都流露出一副慈母神色。07年克莉絲塔絲因為傷患退休，翌年就誕下女兒，亦因為有個幸福家庭，令「阿金」可專心再戰網壇，09年復出更試過重返世界第一。今年打完美網後佢會再次退休，而倫奧被佢視為重點爭標賽事，雖然八強不敵舒拉寶娃，但返屋企見到囡囡，就乜唔開心都唔記得晒。
成績：網球單打8強