菲比斯退出泳壇變番普通人之後，好多私事都毋須再懶神秘咁收收埋埋，據悉菲比斯原來同一位來自洛杉磯嘅25歲金髮模特兒露絲拍拖半年。露絲身高5呎9吋，擁有藍綠色眼睛，鍾意嘅運動係踢足球。因收入唔高又要四圍飛嘅關係，要喺夜店做侍應幫補旅費。消息指菲比斯曾經勸露絲唔好再打工，全職做少奶奶，但露絲就話自己仲有夢想，唔想咁快就放棄。
於當地時間星期日，菲比斯帶埋露絲到倫敦夜店開派對慶祝，據知情人所講菲比斯喺派對玩得好開心，其中一個原因係今屆奧運取得4金2銀佳績，第二係佢正式甩難唔使再練水。菲比斯一向自認貪玩，無奈做運動員規限多多，令佢覺得生活枯燥乏味，今次終於可以同班老友記癲番晚，梗係飲得盡情玩得高興啦！期間菲比斯更手執今屆奧運全數6面獎牌，同老友影大合照。
菲比斯玩到凌晨4點先至離開，上車後更向記者大晒奧運獎牌，女友露絲亦喺車內。去到星期一菲比斯出席贊助商活動時，亦都好大方咁拖住呢位模特兒女友進場。菲比斯早前為要專心備戰奧運，所以對私生活隻字不提。不過露絲就好少避忌，經常喺twitter留言為愛人打氣之餘，更上載多幅與菲比斯嘅合照，擺明向一眾女粉絲「宣示主權」。
另一位美國泳手羅切特，同菲比斯一樣開派對慶祝。呢位型男聯同幾名隊友到夜店狂歡，佢哋飲咗大量香檳、伏特加及龍舌酒，由夜晚11點劈到凌晨3點半。佢除咗帶埋家姐同妹出席外，身邊不時有女性埋身，更有個靚女從後攬往羅切特條腰添！