烏拉圭被趕入絕路，蘇亞雷斯、卡雲尼係時候出真功夫，同主辦國英國死過！本身今戰已夠睇頭，加上「烏圭」上仗爆冷輸波後，今仗幾乎非勝不可，肯定谷起120%戰鬥力無間喪攻。英國兩戰不敗信心爆棚，於卡迪夫千禧球場打反擊合晒何尺，大盤要得過。（有線63及203台周四凌晨2時45分直播）
當日進行分組賽抽籤後，「英烏大戰」即時成為焦點，一隊係主辦國，另一隊強陣出擊，可謂萬眾期待。英國於熱身賽吞巴西兩蛋被插到飛起，但賽事開打後穩打穩紮，有唔錯發揮，小組一勝一和累積四分，今戰只須打和就肯定晉級。上場鬥阿聯酋除傑斯建功外，史杜列治後備入波狀態冒升。事實上，英倫三島球員不嬲唔識踢陣地戰，打反擊反而更佳，今場佢哋樂得畀烏拉圭搓住踢，伺機突襲更易入波。
烏拉圭雖有黃金陣容，兩個箭頭名氣勁大，又有新貴拉斯頓拉美利斯彈起，順理成章被捧成奪金熱門之一。可能自視過高，「烏圭」頭兩仗表現一般，對阿聯酋贏得辛苦，上仗對塞內加爾更輸兩粒。
目前「烏圭」少英國同塞內加爾一分，今場如果打和，要寄望塞軍大比數輸畀阿聯酋波先出到線。「烏圭」近年於國際賽屢創佳績，「哨牙蘇」同卡雲尼從來冇令人失望過，今次逼虎跳牆，球隊必義無反顧豁出去狂攻，大盤必捧。 麥馬拿仁