除咗德甲外流五虎將，今屆奧運隊人氣最勁一定係効力名古屋鯨魚嘅永井謙佑，呢名二十三歲前鋒喺六月份四場日職個人射入六球，如果今屆倫奧能夠交出好表現，好大機會步一眾前輩後塵轉戰歐洲。
外號「飛人」嘅永井謙佑讀書時屬短跑高手，據報可在5秒8內完成50米跑，所以經常能夠憑速度突破對手防線。永井3歲時因父親工作關係曾移居巴西，8歲回日本居住，期間雖然未有接受正統足球訓練，但在充滿森巴足球嘅生活環境下，令到永井培養出一份對足球嘅熱愛。09年永井以指定大學生身份加盟日乙球隊福岡黃蜂學法，之後一季再轉到日職神戶勝利船，首度於頂級聯賽亮相，表現一鳴驚人，大學畢業後永井正式加盟名古屋鯨魚，在澳洲國腳約舒亞堅尼地扶助下，演出更上一層樓，已被視為未來國家隊前鋒新希望。