惹火索模力撐雷霆再劏小牛

KD夏登拍型仔廣告

雷霆孖寶杜蘭特及占士夏登兩位外表「毒毒哋」的球星，Game3大戰小牛前獲《體育畫報》御用女神Kate到訪打氣。兩位球星以「帶超級模特兒返工」為主題，幫一個耳筒品牌拍廣告，期間Kate全程陪KD同夏登練波，拍攝工作完成後更大讚雷霆孖寶勁型，決定於季後賽為這支西岸球隊打氣。

雷霆出動女模谷士氣，小牛為扭轉總比數落後0比2的劣勢亦唔執輸，教練卡素爾計劃委派「防守專家」馬利安嘜實韋斯布克，並由卡特看管杜蘭特。要知道「過氣飛人」卡特如今已經「回晒塘」，卡素爾此舉隨時玩死自己，雷霆受讓2.5分寧捧下盤。另一場領先場數2比0的熱火作客紐約人雖讓4.5分，但上盤仍然值捧。（now 635台周五早上7:00直播）

普波維治膺最佳教練

另NBA聯盟昨宣布，馬刺主帥普波維治獲得77張第1選票，大幅拋離公牛教練泰保杜（27張）及溜馬教頭禾高（7張）當選今季NBA最佳教練。

本報綜合報道