「籃板王」洛文終於肯離婚放前妻一條生路！在NBA已惡名昭彰嘅大蒲精「妖蟲」洛文，自03年與Michelle結婚後，真正起咗座「墳墓」畀對方，佢爛玩、揮霍、撞板多過食飯唔在講，更衰到臭脾氣虐打老婆，搞到生不如死嘅Michelle結婚一年已申請離婚。只是洛文早前表示自己無法支付孩子80萬美元生活費，更身染頑疾及破產。兩人名存實亡嘅糾紛拉鋸8年，但根據美國著名娛樂網站TMZ消息爆料，年過半百的洛文終於「大發慈悲」，動筆簽字離婚，而獲「放生」嘅Michelle就想攞番一對仔女嘅撫養權。