極品剩女林兆霞揀仔經 品評5星 最愛莫連奴
「極品剩女」阿June近期好多人留意，除好笑到爆外，佢仲為全城「剩女」打氣，令佢哋深信終有一日，都會有個有錢靚仔叫自己baby。林兆霞（June）現實中揀仔都好有要求，今日就「導師」上身，瞓身點評球壇五大巨星。姊妹們，學嘢喇！
因為前男友係曼聯躉，令阿June開始睇波，最愛球星係傑斯、簡東拿同蘇斯克查。女仔睇得波，梗係睇埋型男啦，今次就為佢揀嚟五大巨星C朗、美斯、碧咸、朗尼同莫連奴，又睇吓邊個先係佢杯茶。阿June諗咗陣，首先out咗朗尼同美斯：「朗尼趁老婆大肚出去搞搞震，個格衰到咁，點揀得落手？美斯係就係好波，但佢好似除咗識踢波，就冇乜專長喇喎，我唔鍾意宅男o架。」
嫌C朗浮誇碧咸忙
碧咸、C朗「樣靚身材正」，又啱唔啱睇先？「C朗冇錯又靚仔又大隻，踢波嗰陣又英，不過個人太浮誇喇，佢出場前要用成個鐘梳頭，平時又滿身名牌，揸架超級跑車招搖過市，我唔鍾意太出風頭囉。碧咸係『萬人迷』，有事業心又係好爸爸、好老公，但佢屋企已有四條化骨龍，同佢一齊咪好唔得閒？所以對唔住喇，都係唔啱。」
果然係有要求呀吓！剩番個莫連奴，你啃唔啃得落？「嘩，呢個正呀！我好鍾意莫連奴喺場邊指揮若定，個樣真係好man，個個球星都要聽佢支笛。係女人都鍾意自己個男人叻，莫連奴啱晒我要求。仲有呀，聽講佢好聽老婆話，呢個真係筍盤！」
咁如果搵「寸王」同黃曉明比，阿June又點揀？「咁冇辦法喇，女人始終都係講感情嘅動物，我同曉明嘅愛情咁刻骨銘心，我玩完梗係識返屋企，I want曉明！哈哈哈……」