3宿舍男喜獲吉祥犬 傑志捧盃靠芝治

「芝治」是誰？其實「芝治」乃一隻約3個月大的金毛尋回犬，傑志在本月15日出戰聯賽盃決賽，身為「芝治」監護人的林嘉緯、朱兆基和曾錦濤在本月12日才從前甲組球員朱偉霖跟太太經營的寵物店接走這隻狗女，故有幸與「芝治」碰面的人不多。現在就由「芝治」的三位「爸爸」，為大家介紹一下這位傑志大家庭的新成員。

3個爸爸Q&A

V：記者 朱：朱兆基 林：林嘉緯 曾：曾錦濤

V：點解會有喺宿舍養狗嘅念頭？

朱：冇呀！咁啱同佢哋（指林、曾兩人）傾開不如養隻狗仔，等宿舍多啲生氣同歡樂，又咁啱「阿霖」（指朱偉霖）話佢舖頭有個客隻「金毛」生咗兩隻BB，問我哋有冇興趣要番隻，就係咁啦！

V：你哋識唔識養架？唔會熱情過後就話唔養畀番人哋架？

曾：梗係唔會！我哋好有責任，我同「兆基」屋企都有養狗，細細個已經同寵物接觸，雖然「嘉緯」未養過，但識佢嘅人都知佢份人好細心、好溫柔，「芝治」亦都好跟佢。

初叫甘仔冇反應

V：話時話，我最初聽到「芝治」個名仲以為係英文名Gigi，個名點嚟架？咩意思？

朱：咩意思就唔好講喇（三人齊齊奸笑），費事有人唔開心啦！

林：我哋試過用唔同名嗌佢，好似「甘仔」（三人再齊齊奸笑），佢都冇咩反應，但一嗌「芝治」，佢就好興奮咁走埋嚟同我哋玩，佢好似好鍾意呢個名。

V：「芝治」返咗宿舍個幾星期喇，有冇咩趣事？

曾：佢好嗲又好乖，氹得我哋好開心，好似有日佢照住塊鏡見到自己，以為有第二隻狗喺度，之後圍住塊鏡跑嚟跑去「搵自己」，笑死我哋。

朱：「芝治」好有性架，佢會知道做錯嘢激嬲咗我哋，我哋大聲啲講嘢咋，佢就會跑埋嚟黐身黐勢嗲我哋，我哋仲點識嬲呀？

林：佢啱啱嚟已經成日想跳上我張床度，但跳唔到，點知早幾日我喺床尾睇緊嘢，一擰轉頭就見到佢瞓咗喺我後邊，嚇咗我一跳。幾日咋，就跳到上嚟，真係快高長大。

V：聽講「金毛」大得好快，日常照顧都幾講工夫，有信心搞得掂？

林：「阿基」應該OK，但我同「阿濤」暫時都唔敢同「芝治」沖涼，所以有咩需要都會帶佢去「阿霖」舖頭，交畀阿嫂搞掂。

贏埋聯賽就堅旺

V：大家覺得宿舍多咗「芝治」嘅感覺點？

朱：大家多咗好多共同話題，開口埋口都係「芝治」。

曾：除咗同佢玩得好開心之外，最緊要係佢好旺我哋，佢嚟咗三、四日，我哋就贏咗聯賽盃喇。

林：我都有「阿曾」嘅諗法，不過如果我哋贏埋個聯賽就堅旺我哋喇！哈！哈！（上周四林嘉緯榮膺三月份港甲MVP後，就在社交網站留言多謝「芝治」。）

圖/文：Vincent、戴陶蔚

鳴謝：Flower Pet Grooming