傑志女神大鑼大鼓嗌爆旺角場

26歲嘅Kelena去年夏天離開有線體育台另覓發展，但仍視自己為本地體育界一分子：「香港足球係需要多啲人入場支持，所以當我離開電視台後，傑志搵我做啦啦隊隊長，我就應承咗嘞！」

熟讀軍情 望多啲球迷撐場

Kelena笑說，最初加入傑志時只認得盧均宜同盧比度，不過睇多幾場波就認得晒啲人，率領球迷打氣，今場決賽亦已經熟讀傑志軍情：「佐迪同丹尼都傷咗，盧比度又停賽，雖然唔可以以最強人腳應戰，但作為球迷會一分子，我哋可以做嘅就係盡力打氣！」

原來做港甲打氣團都幾谷氣，例如傑志嘅將軍澳主場，就唔准球迷使用樂器，因為怕被居民投訴，Kelena話每次主場都唔可以盡情大叫，好吊癮，今次嚟到旺角場，佢哋就準備「大鑼大鼓」兼嗌到聲沙。