食過夜粥嘅創作女歌手……JuJu周董上身
「球」愛敢死隊自出街以來，武鬥時間多數都係玩波為主，真係足球、籃球、網球乜都玩過。雖然波係好玩，但為證明敢死隊係一個多元化節目，就搞搞新意思，變做「武」愛敢死隊，同靚女嘉賓耍功夫。今次我哋請到創作女歌手陳鈺芸（JuJu）上嚟，耍兩招畀大家睇吓。
咪以為JuJu係音樂人就好內向好斯文，其實佢百足咁多爪，禮樂射御書數六藝瓣瓣精。據JuJu所講，佢由細到大都食慣夜粥，學過洪拳、詠春、柔道、合氣道，簡直係集各家之大成。參與過電影《詠春小龍》之後，更被譽為新一代打女。
其實JuJu係動靜皆宜嘅靚女，除咗對武術有興趣之外，亦彈得一手好鋼琴，本身又係理科達人，主修電腦科學及數學，所以話佢多才多藝就係咁解。既然今次請JuJu上嚟露兩手，佢梗係盡騷哥利啦！其中一個精采環節就係耍雙節棍。
當大家仲懷疑JuJu舞唔舞得掂，會唔會打親自己之時，JuJu即刻以行動證明一切，好似周杰倫上身一樣，兩碌棍不停閃動，小記同攝影師都嘩嘩聲，一齊唱：「快使用雙節棍，哼哼哈兮」！大家都知雙節棍係高層次兵器，一唔小心就會扑親自己，JuJu話初時練習經常受傷，依家可以揮灑自如，絕對係血與汗換來嘅成果。
現跟徐家傑學泰拳
最近JuJu話想學吓泰拳，感受吓拳拳到肉嘅感覺，所以就去咗由徐家傑創立嘅坤青拳會，學習泰拳基本動作。
或者因為JuJu身手不凡，加上徐師傅悉心指導，JuJu好快就掌握到泰拳基本功，徐師傅都讚佢有天分，係習武嘅好材料。
圖／文：司徒子文、巨高