馬國站麥拿侖排頭兩位

冰人受罰兼火燒車房

今站最多阻滯就係蓮花車隊嘅「冰人」拉哥倫，佢日前因更換變速箱被罰退後五位起步，前晚車房更發生火警，幾乎連架車都燒埋。

拉哥倫昨在排位賽排第五，但由於車隊日前為他更換變速箱，今日賽事被罰退後五位起步。至於更換變速箱嘅原因，問題源於上一站澳洲站賽事，拉哥倫戰車衝出賽道，雜草進入散熱器後令變速箱過熱，軸承罩損壞，車隊經考慮後決定更換變速箱。

咁都未算，拉哥倫車房前晚發生火警，起因係車房內一個雪櫃着火，幸好工作人員及時保住戰車，只有部分賽車裝備報銷，無人受傷，算係不幸中之大幸。