方誠義自戀6舊腹肌
國際巨星Lady GaGa風靡全球，香港籃壇同樣有個「永倫GaGa」，花名「阿Ga」的方誠義近年不斷舉鐵做Gym，飲「大隻奶粉」，終由昔日「排骨仔」變成肌肉型男，場上表現更愈戰愈勁，練得一身「爆衫」肌肉的「阿Ga」，已準備就緒為永倫展開高級組銀牌衞冕戰，今日球隊首戰升班馬旭暉，誓要攞頭彩、壯聲威！
勤做Gym變筋肉男
中學時因校內沒有足球場，至F.4時才「棄足投籃」的方誠義，無疑比一般籃球員遲起步，21歲初登甲一時，「阿Ga」還是一名「排骨仔」，與他出世時是9磅巨嬰不成正比。不過自次年轉投永倫後，「阿Ga」決心複製NBA球星「魔獸」杜域侯活身形，踏入健身房狂操：「當年見到杜域侯活成身肌肉覺得好型，好想操到好似佢一樣。」
「阿Ga」試過一周「做Gym」4日，更食「大隻奶粉」催谷肌肉，日子有功愈操愈健碩，一身肌肉除令他每天出街都要側身才出到門口外，亦令「阿Ga」近年成為永倫主力：「我絕對屬於自戀的人，大隻之後我覺得自己有型咗，自信心提高不少。」經多年苦練下，「阿Ga」目前擁6舊腹肌，雙手「閒閒地」舉起120磅重鐵，彈跳力大幅提升，大力入樽對他來說可謂冇難度。
為可樂唔玩健美比賽
做Gym做上癮，「阿Ga」今年決定重拾書包，報讀體適能總會的基礎證書課程，將健身興趣變成未來事業：「我當然希望一直打籃球打到我打不到為止，但人總要為將來鋪路，考Gym牌除可自我增值外，也可教導自己的學生，從體能上提升籃球基本功。」目前亦是籃球教練的「阿Ga」雖然笑稱「自戀」，但卻堅拒參加健美先生比賽，全因為食的他一日最少要飲3罐可樂，要他為健美比賽而「戒口」，一定No Way。
永倫GaGa「資」多啲
年齡：28
身高/體重：1.93米/ 195磅
効力球隊：永倫及香港代表隊
威水史：5次甲一聯賽冠軍（2006-07、2009-11）07年甲一「明星賽」入樽王
圖／文：徐飛、Kin
場地鳴謝：mYoga