林書豪連續「停瘋」，球評家歸咎於兩個原因，一係J.Lin打法單調，二係同「甜瓜」無法共存。天真嘅J.Lin得悉後又真係出盡力去改善，對朗度時專登用左手帶波，結果幾球剷籃都一仆一碌。
其實J.Lin諗多咗，改改改，改what！歷史上都唔知幾多偉大球員係獨沽一味，渣巴最叻天勾，唔通你話佢單調，叫佢射三分咩，「晚年」嘅米高佐敦咪又係得一招fade away；就算足球世界都一樣，加里夫巴利夠快，仲同你玩花招咩，下下踩行油爆你，吹得佢脹咩？其實呢個世界上，只要你有一招必殺技，怕咩重用又重用，捉到老鼠就係好貓啦。
J.Lin最強之處係first step快，就算畀人知道你剷右邊又點？你夠快，根本冇人跟到你，反而你夾硬用隻未完美嘅左手帶波，只會自討苦吃。
至於同「甜瓜」嘅問題就仲易解決，正所謂人不為己、天誅地滅，依家係人都知道「甜瓜」傷愈復出後，戰績仲衰過之前，其實J.Lin大可以當佢冇到，打番之前冇「甜瓜」時嘅風格，避免再「停瘋」。老實講依家紐約人根本就唔會放走林書豪呢隻金蛋，若然「林瓜」組合持續唔work，放棄嘅一定係安東尼，J.Lin到時咪可以話晒事，坐正做紐約大佬囉，得閒去美國唐人街租番套《金枝慾孽》睇吓，又或者多啲留意最近嘅「豬狼大戰」，就知道想生存，一定要夠狼。